استراحة أبو العريف
ابو العريف .. شايفك اليوم محزون ومهموم «ورايح فيها» كل هذا علشان هزيمة الهلال من النصر ؟
من حقكم تفرحون سبع سنوات ما شفتم الفرحة أمام الذيب الأزرق , وأحب أقول لك يالحبيب أنا اللي هزم الهلال مش النصر , اللي هزمهم أغنية عبد الله الرويشد (صابك غرور , والغرور لمن يصيبك مشكلة) هذي كل السالفة , الهلال هو من هزم نفسه .
ابو العريف وحده وحده , ولا تعصب , بالله عليك شفت شباب النصر أمام عواجيز الهلال أمس ؟
مشكلتكم يالنصراوية انكم تعتبرون فوزكم على الزعيم بطولة ما بعدها بطولة , بعكس الحبايب الفريق الأزرق عمره ما فكر فيكم , ما يفكر إلا في البطولات والألقاب , يعني بصريح العبارة بطولتكم الفوز على الهلال , وبطولة الأزرق الفوز باللقب .
ابو العريف خلك من الخربطة , شفت جمهور النصر امس , اللي أكثر هو ولا جمهور الهلال , طبعا ودنا الإجابة بدون استفتاء زغبي ..!!
والله مساكين , ترى مبارياتكم عند جمهور الهلال , مثل لقاءات فرق المؤخرة , مضمونه النقاط الثلاث وكانت في الجيب , ولكن أمس «رمية من غير رامي».
حلوة منك ابو العريف «رامي» عايش تقصد ولا راغب علامة .. وما دام قلت رامي وانا قلت راغب .. بصراحة تشبه مين فيهم ؟
شوف يالحبيب أنا والعياذ بالله من كلمة أنا , آخذ من حسين فهمي لون عيونه , ومن جورج وسوف صوته , ومن الهدهود وسامته .
فشلتنا يابو العريف , اسمه بدر الفرهود , وليس الهدهود ؟
الله يلعن ابو اللقافة , ويش جاب الهدهود إلى الفرهود , الأول يالغالي فنان كويتي , والثاني سعودي مقدم برامج رياضية , يعني لازم تسوي نفسك فاهم .
ابو العريف خلنا من الهدهود والفرهود , سمعت تصريح الكبير الأمير فيصل بن تركي, والأمير الوليد بن بدر بعد مباراة أمس ؟
اليوم رد البلطان بيكون في الملعب , وابو الوليد ما يفوت أكيد بيغمز غمزة في تصريحه , وبيخليكم تنسون فوزكم على الهلال , وتهتمون بالشباب , والله البلطان «راعيها».
ابو العريف .. ذبحنا اللي يسأل قلبي عن نصر وهلال .. خلنا نسأل عن مهرجان اعتزال حمزة ؟
من جد نصر هلال انتهى من زمان , ولا داعي تجيب سيرته , وحمزة يستاهل المهرجان , بس حاست عندي لم تجاهل البلوي في كلمته الوداعية .
ابو العريف .. المهم ان الهلال لن يحقق إنجاز الاتفاق حتى لو حقق لقب الدوري هذا العام , فقد خسر أمس , والاتفاق حقق اللقب بدون هزيمة ؟
اعرفكم زين يالحلوين كلكم فرحانين «دبل» عندكم عقدة ضد الزعيم , ولكن بعون الله الهلال محقق جميع البطولات هالسنة , ويزيكم حرة , وترى فوزكم أمس «بيضة ديك» ولا تفرحون كثير , ترى الهلال مش مثل غيره , إذا خسر مباراة ينهار , مثل عميدكم ..!!
ابو العريف .. خفف الدوس .. تراك زودته حبتين مع هلالك ؟
قولي يالحبيب , أحد ما ينطر الهلال , ويحب الهلال , ويستمتع برؤية الهلال , ترى الاسم له دور , مش اسم حيا الله .. اسمه النصر وهو كله هزايم ..!!
الرئيسية 
التسجيل 
