الشاي يحلى مجرد يلمس شفاتـك‎

يا قلبي / امن امس ليه البال متعكّـر
من شوفت الزين ليـه اتزيـد دقاتـك

ولا قلت له انت ورد امن الخجـل حَمّـر
الـورد مـا يصيـر ورد الا بلمساتـك

ياورد - فالشاي ليه اتـزود السكّـر
الشاي يحلى مجرد يلمس شفاتـك

واليا اشتهيت الحلى / مكتـوب ومقـدّر
إنّـه يـذوب ان تَلَمّسْـتـه يديّـاتـك

ابهدي العطر لـك واكتـب وابـا اعبّـر
بنرجسيتـك واسـمـك وانتصـراتـك

ودي اصيـر العطـر واصبـر وتتصبّـر
متى يجي موعدك واصحى بهمساتـك

وان ضاق وقتك تجـي للعطـر واتفكّـر
ارشه الحين ؟ ، وانا اقول : هيهاتـك

بشويش رِشّه ، تراهـو منـك يتعطّـر
ويا بخته ان شاركـك حتـى معاناتـك

البال من قبـل اشوفـك كـان متعكّـر
وامّا العيـون ابهرتهـا مثـل حالاتـك

والشاي من يـوم ذقتـه صـار يتكبـر
واما الحلى صار ما يمشي بمشهاتـك

ومعذور لو هو شربك الشاي يـا سكـر
ضامي ولا يرتـوي الا مـن اشفاتـك

ومعـذور ياقلبـي ولابــد تتصـبـر
واتزيد من شوف بعض الناس دقاتك